Янгиликлар

16.03.2022

Мазкур жараён уч босқичда амалга оширилади.

Биринчиси, тайёргарлик босқичи бўлиб, уч йилга яқин вақт давом этади.

Иккинчиси, асосий босқич бўлиб, бунда бевосита аҳолини рўйхатга олиш амалга оширилади, яъни аҳоли тўғрисидаги маълумотлар йиғилади, назорат текшируви ўтказилади ва аҳолини рўйхатга олиш материаллари топширилади. Бу тахминан икки ой муддатни ташкил этади. Сўнгги босқич қарийб уч йил давом этиб, олинган маълумотлар кодлаштириш ёрдамида таҳлил қилиниб, натижалар эълон қилинади. Рўйхатга олувчиларни танлаш ҳам энг муҳим масалалардан бири ҳисобланади. Чунки маълумотларнинг тўғрилигига бевосита айни улар масъул бўлади ва шакллантирилган маълумотлар реал бўлиши шарт.

Бу жараёнга жалб этиладиган ходимлар ҳар хил ёшда ва касбда бўлиши, биринчи навбатда, Давлат статистика қўмитаси ва унинг вилоят, шаҳар ва туман бўлимлари ходимлари, статистика йўналишида таҳсил олаётган талабалар, магистрлар, шунингдек, таянч докторантлар бўлиши мумкин. Ёши ва касбидан қатъи назар, аҳолини рўйхатга олувчилар учун қисқа муддатли ўқув курслари ташкил этилади ва зарурат туғилса, уларга қўшимча маслаҳатлар берилади.

Аҳолини рўйхатга олиш тадбирларини ўтказиш билан боғлиқ харажатлар амалдаги ҳужжатларга, шунингдек, Вазирлар Маҳкамасининг қарорларига мувофиқ белгиланади. Жараённи давлат бюджети маблағлари ва қонун билан тақиқланмаган бошқа маблағлар ҳисобига молиялаштириш кўзда тутилган.

Амалдаги меъёрий ҳужжатларга биноан, якуний маълумотларни уч тилда эълон қилиниши кўзда тутилган. Чора-тадбирлар дастурида аҳолини рўйхатга олиш натижаларини расмий чоп этиш, тарқатиш, ахборот билан таъминлаш ва эълон қилиш, аҳолини рўйхатга олишнинг дастлабки ва якуний маълумотларини архивда сақлашга тайёрлаш муддати 2025 йил 1 декабрга қадар, деб кўрсатилган. Яъни маълумотлар билан танишишнинг охирги чегара муддати белгиланган. Бироқ агарда тезкор фаолият юритилса, ушбу муддатдан олдин ҳам эълон қилиш имконияти мавжуд.

10.03.2022

Davlatimiz rahbari tomonidan “Aholini ro'yxatga olish to’g’risida”gi O’zbekiston Respublikasining Qonuni imzolangan. Mazkur Qonun, aholini ro’yxatga olish sohasidagi munosabatlarni har tomonlama tartibga soluvchi ilk bor qabul qilingan huquqiy hujjat sifatida O’zbekiston tarixidan o’rin oldi.

Chunki shu vaqtgacha bu sohada qonunchiligimizda hech qanday hujjat yo’q edi. Qonun, O’zbekiston Respublikasi Prezidentining 2019-yil 5-fevraldagi “O’zbekiston Respublikasida aholini ro’yxatga olishni o’tkazish Kontseptsiyasini tasdiqlash to’g’risida”gi PF5655-son Farmoniga muvofiq ishlab chiqildi.

Qonunni ishlab chiqishda, Birlashgan Millatlar Tashkiloti va Yevropa statistiklari konferentsiyasining aholini ro’yxatga olishni o’tkazish bo’yicha asosiy tamoyillari va tavsiyalaridan asos sifatida foydalanildi. Qonun beshta bob va o’ttiz bir moddadan iborat bo’lib, unda qonunning maqsadi, asosiy tushunchalar, aholini ro’yxatga olishning vazifalari va printsiplari yoritib berilgan.

Asosiy printsiplardan biri sifatida davriylik printsipi, ya’ni aholini ro’yxatga olish o’n yilda kamida bir marta o'tkazilishi hamda aholini ro’yxatga olishni o’tkazish to’g’risidagi qaror, O’zbekiston Respublikasi Prezidenti tomonidan qabul qilinishi belgilab qo’yilgan. Aholini ro’yxatga olish jarayonida, shaxsga doir ma'lumotlar Vazirlar Mahkamasi tomonidan tasdiqlanadigan ro’yxatga olish varaqlari asosida har bir respondent uchun yakka tartibda to’ldiriladi, ya’ni ro’yxatga oluvchi shaxslar tomonidan uymauy yurib, har bir respondent uchun alohida to’ldiriladi.

09.03.2022

Бугун Поп тумани ҳокими бошчилигидаги ишчи гуруҳи туманнинг энг олис ҳудуди бўлган Қўштепа ёшлари билан учрашди.

Дастлаб Қўштепа маҳалласидаги ҳоким ёрдамчиси ва ёшлар вакилининг ҳудудда олиб бораётган иш фаолиятлари ҳамда йўл хариталари билан танишиб уларнинг йўл хариталари борасида ўртоқлашди. Ундан сўнг очиқ мулоқот бошланди.

Жараёнда туман Халқ қабулхонаси мудири, ёшлар ишлари агентлиги бошлиғи ва ташкилот раҳбарлари иштирок этди.

Мулоқот давомида ёшларнинг ишга жойлашиш, ер майдони ва банк кредити олиш, ҳудудда ахборот-кутубхона маркази ташкил этиш, компьютер саводхонлигини ошириш каби мавзулардаги мурожаат ва таклифлари тингланди.

Ёшлар томонидан билдирилган мурожаатлар тегишли мутасаддилар томонидан ижрога қаратилди ва жойнинг ўзида ижобий ҳал этиш юзасидан чоралар белгиланди.

28.02.2022

(2022 йил 1 январь ҳолатига)

Доимий аҳоли сони: Дастлабки маълумотларга кўра, 2022 йилнинг 1 январь ҳолатига Поп туманининг доимий аҳоли сони 226,9 минг кишини ташкил этиб, йил бошига нисбатан 4,2 минг кишига ёки 1,9 % га кўпайган.

Туғилиш даражаси: 2021 йилнинг январь–декабрь ойларида туғилганлар сони 5483 кишини ташкил қилган ва  2020 йилнинг мос даврига (5199 киши бўлган) нисбатан 284 кишига кўпайган.

Ўлим даражаси: 2021 йилнинг январь–декабрь ойларида вафот этганлар сони 1040 кишини ташкил қилди ва 2020 йилнинг мос даврига (1022 киши бўлган) нисбатан 18 кишига кўп бўлган.

Миграция: Дастлабки маълумотларга кўра 2021 йилнинг январь–декабрь ойларида туман бўйича кўчиб келганлар сони 274 кишини, шу давр мобайнида кўчиб кетганлар сони эса 526 кишини ташкил этиб,  миграция сальдоси - 252 кишига кам бўлган.

Никоҳ ва ажралишлар: 2021 йилнинг январь–декабрь ойларида ФҲДЁ органларида 1943 та никоҳлар қайд қилиниб, 2020 йилнинг мос даврига (1810 та бўлган) нисбатан 133 тага кўпайган бўлса, шу давр мобайнида 253 та никоҳдан ажралишлар рўйхатга олинган бўлиб, ўтган йилнинг мос даврига (202 та бўлган) нисбатан 51 тага кўпайган.

 Поп туман статистика бўлими.

28.02.2022

(2021 йилнинг январь-декабрь ойларида)

Поп туман статистика бўлими.